काठमाडौं । नेकपा एकीकृत समाजवादीले आफ्नो भागमा परेको मन्त्रालयका सबै मन्त्री हेरेफेर गर्नका लागि नयाँ नामावली प्रधानमन्त्री शेरबहादुर देउवालाई बुझाएको छ । पार्टी उपमहासचिव विजय पौडेलका अनुसार जीवनराम श्रेष्ठ संस्कृति, पर्यटन तथा नागरिक उड्डयन, मेटमणि चौधरी शहरी विकास, भवानी खापुङ स्वास्थ्य तथा जनसंख्या, शेरबहादुर कुँवर श्रम, रोजगार तथा सामाजिक सुरक्षा मन्त्री बन्नेछन् । त्यस्तै हीरा केसी स्वास्थ्य तथा जनसंख्या राज्यमन्त्री बन्नेछन् ।
स्वास्थ्य राज्यमन्त्री रहेका भवानी खापुङलाई मन्त्री बनाइएको छ भने यसअघि संस्कृति, पर्यटन तथा नागरिक उड्डयन मन्त्री प्रेम आले, शहरी विकास मन्त्री रामकुमारी झाक्री, स्वास्थ्य तथा जनसंख्या मन्त्री विरोध खतिवडा, श्रम, रोजगार तथा सामाजिक सुरक्षा मन्त्री कृष्णकुमार (किसान) श्रेष्ठ मन्त्री थिए ।
६ महिनाका लागि भनेर पठाएका उनीहरुलाई फिर्ता बोलाउँदा कसैले मन दुखाउन नहुने बताउँदै उनले पार्टीको निर्णय सबैले पालना गर्नुपर्ने बताए । बैठकमा पार्टीबाट मन्त्रिपरिषद् सदस्यका विषयमा समीक्षा हुने र उनीहरुलाई बोलाउने विषयमा छलफल भएको जानकारी दिएका उनले अब कसलाई पठाउने भन्ने विषय टुंगो लगाउने जिम्मा अध्यक्ष माधवकुमार नेपाललाई दिइएको थियो ।
