काठमाडौं । नक्कली शरणार्थी प्रकरणमा थुनामा रहेकामध्ये ७ जनाले उच्च अदालत पाटनमा निवेदन दिएका छन् । काठमाडौं जिल्ला अदालतको आदेशविरुद्ध नेपाली कांग्रेसका पूर्वसांसद आङटावा शेर्पा, डा.इन्द्रजित राईसहित ७ जनाले रिट दर्ता गराएका हुन् ।
उनीहरुले दिएको दिएको रिट बिहीबार दर्ता भएको उच्च अदालत पाटनले जनाएको छ । फौजदारी कार्यविधि संहिता २०७४ को दफा ७३ बमोजिम ‘बेरितको आदेश बदर गरिपाउँ’ भन्दै पूर्वसांसद आङटावा शेर्पा, नरेन्द्र केसी, गोविन्दबहादुर चौधरी, पूर्वगृहमन्त्री रामबहादुर थापाका सुरक्षा सल्लाहकार डा.ईन्द्रजित राई, सानु भण्डारी, हरिभक्त महर्जन र लक्ष्मी महर्जनले निवेदन दिएका हुन् ।
काठमाडौं जिल्ला अदालतका न्यायाधीश प्रेमप्रसाद न्यौपानेको इजलासले असार १ मा पूर्वगृहमन्त्री बालकृष्ण खाँणसहित १६ जनालाई थुनामा राख्ने आदेश दिएको थियो । उच्चमा पुनरावेदन दिएकी लक्ष्मी महर्जन भने ५ लाख धरौटीमा रिहा भएकी थिइन् ।
