काठमाडौं । नेकपा माओवादी केन्द्रको आज बिहान बस्ने भनिएको स्थायी कमिटी बैठक अपराह्नसम्मका लागि सारिएको छ ।
आज बिहान ९ बजेदेखि बस्ने तय भएको बैठक तयारी नपुगेको भन्दै अपराह्न ४ बजेका लागि सारिएको हो ।
आजको बैठकमा माओवादी अध्यक्ष प्रचण्डले पदाधिकारी प्रस्ताव गर्ने तयारी छ । माओवादीको आठौं महाधिवेशनको ७ महिना बितिसक्दा पनि अध्यक्ष प्रचण्डले पधाधिकारी चयन गर्न सकेको छैन ।
महासचिवमा सहमति नहुँदा पदाधिकारीको टुंगो लाग्न नसकेको हो । प्रचण्डले नेता देव गुरुङलाई महासचिव बनाउने तयारी गरेको स्रोतले जनाएको छ ।
बुधबार बसेको स्थायी समिति बैठकले पदाधिकारी र स्थायी समितिका सदस्य बिहीबार टुंग्याउने निर्णय गरेको थियो ।
