नेपालगन्ज । प्रस्तावित वैकुण्ठधाम सिधनियाघाट निर्माणको सहयोगार्थ नेपालगन्जमा जारी वैकुण्ठधाम आध्यात्मिक महोत्सवको भागवत प्रवचनको अन्तिम दिन एक करोड आर्थिक संकलन भएको छ । शुक्रबार समापन सहित आध्यात्मिक प्रवचन जारी राखिने भएपनि दाताहरुले आजै ठुलो संख्यामा कार्यक्रमस्थलमा उपस्थित भएर दान गरेका थिए । आयोजकले दान लिने तथा प्रवचनको कार्यक्रम भोलीपनि जारी रहने जनाएको छ । 
कथा बाचन गरिरहनु भएका शिरोमणी पण्डित दीनबन्धु पोखरेलले "धार्मिक सद्भावको नमूना; ‘वैकुण्ठधाम आध्यात्मिक महोत्सव’ नेपालगंजमा बाँकेका मुस्लिम समुदायका इश्तियाक अहमद शाहबाट रू. ५ लाख दानसहित आरतीमा सरिक, धार्मिक सहिष्णुता र प्रेमको भाव प्रस्तुत, हजारौं भक्त-जनको सहभागिता, आज एकै दिनमा १ करोड भन्दा बढी दान संकलन ।" भनि सामाजिक सञ्जालमा स्टाटस लेख्नु भएको छ ।
मुल समितिका संयोजक डा. सुरेश कुमार कानोडियाले धार्मिक सद्भावको शहरको रुपमा चिनिएको नेपालगञ्जले आज फेरी एउटा उदाहरण प्रस्तुत गरेको बताउँदै बैकुण्ठधाम निर्माणका लागि ५ लाख दान गरिदिनु भएको मा इस्तियाक अहमद शाहलाई धन्यवाद दिनु भयो । उहाँले धार्मिक द्वन्द्व निम्त्याउन खोज्नेहरुलाई शाहबाट शिक्षा लिन समेत आग्रह गर्नु भयो । शाह नरैनापुर गाउँपालिका अध्यक्ष हुन । 
