बाँके । बाँकेको कोहलपुरमा हुने मिडिया सम्मेलनको तयारी पूरा भएको छ । लुम्बिनी प्रदेशभित्र रहेका सञ्चारमाध्यमहरुको संस्थागत विकास र व्यावसायिक एकरुपता कायम गर्ने मुख्य उद्देश्यसहित फाल्गुन २४ र २५ गते मिडिया सम्मेलन गर्न लागिएको प्रेस सेन्टर नेपालले जनाएको छ ।
शुक्रबार कोहलपुरमा प्रेस सेन्टर नेपाल लुम्बिनी प्रदेश समितिको पदाधिकारी बैठक वसी सम्मेलनलाई भव्यरुपमा सफल बनाउन सरोकारवाला अपिल गर्ने निर्णय गरेको छ ।
प्रेस सेन्टर नेपाल लुम्बिनी प्रदेशको आयोजनामा प्रदेशभित्र रहेका विभिन्न छापा माध्यम, रेडियो, टेलिभिजन तथा अनलाइन मिडियाहरु सहभागि हुने गरी यही फाल्गुन २४ र २५ गते पहिलो पटक लुम्बिनी प्रदेश स्तरीय सम्मेलन गर्न लागिएको हो ।
सम्मेलनबाट लुम्बिनी प्रदेशको विकासमा यस क्षेत्रका मिडियाहरुको भूमिका र लुम्बिनी प्रदेशमा मिडियाहरुको अवस्थाका विषयमा छलफल हुने प्रेस सेन्टर नेपाल लुम्बिनी प्रदेशका अध्यक्ष मानसिंह बिकले जानकारी दिनुभयो । “सम्मेलनमा सञ्चारमाध्यमले खेल्दै आएको भूमिका, उनीहरुको संस्थागत विकासका साथै रोजगारी र पेशागत सुरक्षाका विषयमा समेत बहस र छलफल हुनेछ”–उहांले भन्नुभयो ।
सम्मेलनमा छापा माध्यम, विद्युतीय तथा अनलाइन प्रकाशन तथा प्रसारण संस्थाहरुबाट करिव २०० जना सञ्चालक तथा प्रकाशकहरुको सहभागिता रहने छ ।
मिडिया सम्मेलनमा सञ्चारमाध्यमको हक हितका साथै वृत्ति विकास र पेशागत सुरक्षाको बारेमा पनि छलफल हुने सेन्टरका केन्द्रीय उपाध्यक्ष एवं लुम्बिनी प्रदेशका इन्चार्ज अजय दिप शर्माले बताउनुभयो ।
सेन्टरका लुम्बिनी प्रदेश सचिव भुपेन्द्र ओलीका अनुसार सम्मेलनमा डाक्टर डक्ट प्रसाद धितालले मिडिया व्यवस्थापनका सन्दर्भमा कार्यपत्र प्रस्तुत गर्नुहुने छ ।
कोहलपुरमा आयोजना गरिने मिडिया सम्मेलनको प्रधानमन्त्री पुष्पकमल दाहाल प्रचण्डले गर्ने कार्यक्रम तय भएको आयोजकले जनाएको छ ।
