बाँके । बाँकेका नवनिर्वाचित पालिकाका प्रमुखलाई सम्मान गर्दै जिल्ला प्रशासन कार्यालय बाँकेले विपत व्यवस्थापन लगायत समसामयिक विषयमा छलफल गरेको छ ।
प्रमुख जिल्ला अधिकारी सुर्य बहादुर खत्रीको अध्यक्षतामा भएको कार्यक्रममा दोस्रो कार्यकालका लागि निर्वाचित नरैनापुर गाउँपालिका अध्यक्ष इस्तियाक अहमद शाह लगायत ७ वटा पालिका प्रमुखहरुलाई सम्मान गरिएको जिल्ला प्रशासन कार्यालय बाँकेले जनाएको छ । भने डुडुवा गाउँपालिका अध्यक्षको भने सहभागीता रहेको थिएन ।
प्रजिअ खत्रीले पालिका प्रमुखहरुसँग शान्ति सुरक्षामा स्थानीय तहको सहयोग एवम् समन्वयका विषयमा समेत छलफल भएको जानकारी दिनुभयो । उहाँका अनुसार बढ्दो घरेलु हिंसा, लागुऔषधको दुव्र्यसन, झैझगडा नियन्त्रणका लागि सुरक्षा निकाय र पालिकाबीच समन्वय आवश्यक रहेको विषयलाई छलफल गरिएको छ । साथै सामाजिक विक्रिति र विसङ्गतिलाई अन्त्य गर्दै राजनीतिक दलबीच आवश्यक समन्वय र सुमधुर सम्बन्धलाई विशेष जोड दिइएको उहाँले बताउनुभयो ।
विकास निर्माणमा समन्वय, सहजीकरण, अनुगमन र निगरानीमा सहकार्य हुनुपर्ने विषयले पनि छलफलमा प्राथमिकता पाएको थियो । बालुवा, ढुङ्गा, गिट्टी लगायतका नदीजन्य पदार्थको प्रयोग, ठेक्कापट्टा र उत्खनन कानुन सम्वत हुनुपर्नेमा सुरक्षा प्रमुखहरुले जोड दिनु भएको थियो ।
शान्ति सुरक्षाको अवस्था मजवुत बनाउनका लागि सहयोग गर्ने र सुरक्षा निकायसँग आवश्यक समन्वय गर्ने उनीहरुको प्रतिवद्धता छ । नागरिकको अपेक्षा अनुसार सेवाप्रवाहलाई प्रभावकारी बनाउने, सेवामा सहजीकरण र प्रविधि मैत्री सेवा प्रवाहमा जोड दिने विषय पालिका प्रमुखहरुको प्राथमिकतामा परेका छन् । नागरिक मैत्री कानुन निर्माण र अभिलेख व्यवस्थापनको विषयमा पनि कार्यक्रममा छलफल भएको थियो ।
भारतसँगको खुला सीमाका कारण आउनसक्ने चुनौतीलाई मध्यनजर गर्दै सीमा क्षेत्रका पालिकाले सुरक्षामा आवश्यक सहयोग गर्ने प्रतिवद्धता पनि जनाएका छन् । कार्यक्रममा खुला सीमाबाट हुने अवैध ओसारपसार, लागुऔषध नियन्त्रण, अपराधिक गतिविधिको निगरानी र सूचना सम्प्रेषणमा समन्वय एवम् सहकार्यका लागि जोड दिइएको थियो ।
कार्यक्रममा सुरक्षा निकायसँग समन्वय गर्दै अपराधिक क्रियाकलाप नियन्त्रण र जीर्ण सुरक्षा युनिटको पुर्ननिर्माणमा सहकार्य गर्ने कुरामा पालिका प्रमुखहरुले प्रतिवद्धता जनाएका थिए ।
