काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले निर्वाचन आयोगको गतिविधिप्रति असन्तुष्टि जनाएका छन् ।
मनोनयन दर्ताको दिन जनताले स्वत स्फूर्त रुपमा नौमती बाजा बजाएर स्वागत गरेको विषयमा निर्वाचन आयोगले स्पष्टीकरण सोधेको र जवाफ लेख्दा पनि चित्त नबुझाएको भन्दै आयोगको कामप्रति टिप्पणी गरेका हुन् ।
नेकपा माओवादी केन्द्र गोरखा–काठमाडौं सम्पर्क समितिले काठमाडौंमा आयोजना गरेको प्रशिक्षण कार्यक्रमलाई सम्बोधन गर्दै प्रचण्डले निर्वाचन आयोग ‘प्रचण्डले के गर्दैछ ?’ माइक्रोस्कोप लगाएर हेरिरहेको टिप्पणी गरे ।
प्रशिक्षण कार्यक्रममा प्रचण्डले भने– ‘निर्वाचन आयोग प्रचण्डले के गर्दैछ भनेर माइक्रोस्कोप लगाएर हेरिरहेको छ । मनोनयन दर्ता गर्ने बेलामा जनता स्वत स्फूर्त रुपमा गाजाबाजा लिएर आए । त्यो विषयमा मलाई थाहा थिएन । तर, त्यसै विषयमा आयोगले स्पष्टीकरण सोध्यो । मैले जवाफ लेखेको थिए । चित्त बुझ्दो जवाफ भएन रे । त्यो बाजा कहाँबाट आयोग भनेर पत्ता लगाउन निर्देशन दिएको छ रे ।’
प्रचण्डले आफू गोरखा जानु गोरखाली जनताका लागि खुसीको विषय मात्र नरहेर चुनौतीको विषय समेत भएको बताए । आफूसँगै आफ्ना विरोधहरू पनि गोरखा पुगेको भन्दै गोरखाली जनतालाई चुनौती रहेको बताएका हुन् ।
अध्यक्ष प्रचण्डले आफू गोरखा पुगेसँगै सुरक्षा चुनौती थपिएको समेत बताएका छन् । विगतमा आफू अन्य जिल्लाको प्रतिनिधि हुँदा त्यस जिल्ला र क्षेत्रमा सुरक्षा चुनौती रहेको भन्दै अब गोरखामा पनि सुरक्षा चुनौती हुने बताए ।
अध्यक्ष प्रचण्डले आफू गोरखा पुगेसँगै सुरक्षा चुनौती थपिएको भन्दै गोरखाली जनतासँग नेतृत्वको रक्षा गर्न आग्रह समेत गरेका छन् ।
