बाँके । बाँके जिल्लामा स्थानीय तहमार्फत सञ्चालन भइरहेका आयुर्वेद स्वास्थ्य सेवामध्ये नरैनापुर गाउँपालिकामा रहेको नागरिक आरोग्य सेवा केन्द्र प्रथम घोषित भएको छ ।
स्वास्थ्य तथा जनसंख्या मन्त्रालयअन्तर्गतको बाँके आयुर्वेद स्वास्थ्य केन्द्र, नेपालगञ्ज द्वारा आर्थिक वर्ष २०८१/०८२ को वार्षिक प्रतिवेदन मूल्यांकनका आधारमा गरिएको प्रतिस्पर्धामा नागरिक आरोग्य सेवा केन्द्रले उत्कृष्ट सेवा प्रवाहका कारण प्रथम स्थान हासिल गरेको हो ।
बाँके आयुर्वेद स्वास्थ्य केन्द्रले नागरिक आरोग्य सेवा केन्द्र, नरैनापुरलाई सम्मानपत्र प्रदान गर्दै निरन्तर प्रगतिका लागि शुभकामना दिएको छ । सम्मानपत्रमा भनिएको छ , आगामी दिनहरूमा पनि सो सेवा केन्द्रबाट अझ प्रभावकारी, गुणस्तरीय र जनमैत्री सेवा प्रवाह हुने अपेक्षा गरिएको छ ।
कार्यक्रममा बाँके आयुर्वेद स्वास्थ्य केन्द्रका कार्यालय प्रमुख डा. अलोक कुमार पाण्डेले उत्कृष्ट सेवा र समर्पणका लागि नरैनापुरस्थित आरोग्य केन्द्रका सम्पूर्ण स्वास्थ्यकर्मीलाई बधाई दिँदै निरन्तर उत्कृष्ट कार्यदक्षताको उदाहरण प्रस्तुत गर्न आग्रह गर्नुभयो ।
सो अवसरमा प्रदेश सरकार, पुर्व मन्त्री भण्डारी लाल यादव समेत पुरस्कार वितरण गर्दै, आयुर्वेद सेवाको प्रभावकारिता बढाउन यस्तो प्रतिस्पर्धा र सम्मानले थप प्रेरणा दिने विश्वास व्यक्त गर्नुभएको थियो ।
स्थानीय तहमा सेवा प्रवाहको उत्कृष्टता मार्फत जिल्लामै उदाहरण स्थापित गरेको नरैनापुर गाउँपालिकाको नागरिक आरोग्य सेवा केन्द्रले यो सम्मानलाई आगामी दिनमा अझै जनसेवाको प्रेरणाको रूपमा लिने बताएको छ ।
