बाँके । बाँकेको जानकी गाउँपालिका–२ का वडा सदस्य रामधिरज यादव को शुक्रबार राति असामयिक निधन भएको छ। उहाँ लामो समयदेखि जटिल प्रकृतिको रोगबाट पीडित रहँदै आउनुभएको थियो।
जानकी गाउँपालिकाका अध्यक्ष छब्बन खाँ का अनुसार स्वास्थ्य समस्याका कारण उपचाररत रहेका यादवको शुक्रबार राति निधन भएको हो। उहाँको निधनसँगै जानकी गाउँपालिका तथा स्थानीय समुदाय शोकमा डुबेको छ।
वडा सदस्य यादवको निधनप्रति दुःख व्यक्त गर्दै गाउँपालिका अध्यक्ष खाँले शोक वक्तव्य जारी गर्नुभएको छ। वक्तव्यमा स्वर्गीय यादवप्रति भावपूर्ण श्रद्धाञ्जलि अर्पण गर्दै शोकसन्तप्त परिवारजनप्रति गहिरो समवेदना व्यक्त गरिएको छ।
यादव जनप्रतिनिधिका रूपमा मात्र नभई समाजसेवी व्यक्तित्वका रूपमा पनि परिचित हुनुहुन्थ्यो। स्थानीय विकास, सामाजिक एकता तथा जनताका समस्याको समाधानका लागि उहाँले पुर्याएको योगदानलाई गाउँलेहरूले स्मरण गरेका छन्।
स्थानीयवासीका अनुसार उहाँको निधनले जानकी गाउँपालिका–२ मात्र होइन, समग्र गाउँपालिकाले एक जिम्मेवार, जनमुखी र लोकप्रिय जनप्रतिनिधि गुमाएको छ। उहाँको निधनबाट स्थानीय समुदायमा अपूरणीय क्षति पुगेको बताइएको छ।
स्वर्गीय यादवप्रति श्रद्धाञ्जलि अर्पण गर्दै स्थानीयवासी, जनप्रतिनिधि तथा विभिन्न संघ–संस्थाका प्रतिनिधिहरूले उहाँको योगदानलाई सदैव सम्झिरहने बताएका छन्।
