बाँके । कोरोना संक्रमणका कारण बन्द रहेका बाँकेका शैक्षिक संस्थाहरु आगामी फागुन १ गतेदेखि खुल्ने भएका छन् । जिल्ला प्रशासन कार्यालय बाँकेले आज एक सूचना जारी गर्दै विद्यालय, विश्वविद्यालय, कलेज, ट्युसन सेन्टर, तालिम वा अन्य प्रकारका शैक्षिक क्रियाकलापहरु जनस्वास्थ्य र सुरक्षाका मापदण्ड पालना गरी फागुन १ गतेबाट सञ्चालन गर्न निर्देशन दिएको छ।
विद्यालय सञ्चालन गर्दा १२ बर्ष पूरा भएका विद्यार्थीका हकमा नियमितरुपमा तथा १२ बर्ष पूरा नभएका विद्यार्थीको हकमा आलोपालो दिनमा कक्षा सञ्चालन गर्न पाइने प्रमुख जिल्ला अधिकारी सूर्यबहादुर खत्रीद्वारा जारी सूचनामा उल्लेख छ । यस्तै सिनेमा हल, डान्स बार, दोहोरी, नाचघर, क्लब, हेल्थ क्लब, जिम खाना लगायत स्वास्थ्य सुरक्षाका मापदण्ड पालना गर्ने गरी फागुन १ गतेबाट राती १० बजेसम्म सञ्चालन गर्न पाइने भएको छ ।
