काठमाडौं । एसिया कपमा भारतले पाकिस्तानलाई २६७ रनको लक्ष्य प्रस्तुत गरेको छ। श्रीलंकाको क्यान्डीमा टस जितेर ब्याटिङ गरेको भारतले ७ बल अगावै आलआउट हुँदै २६६ रन बनायो।
इशान किसन र हार्दिक पाण्डेले इनिङ सम्हालेपछि भारतले सम्मानजनक लक्ष्य प्रस्तुत गर्न सकेको हो। ९० बल खेलेका हार्दिकले ७ चौका र एक छक्कासहित सर्वाधिक ८७ रन बनाए। त्यसअघि पेभेलियन फर्किएका किशनले ९ चौका र दुई छक्कासहित ८२ रन बनाए।
भारतले दस ओभरको खेलमै महत्वपूर्ण तीन विकेट गुमाउन पुगेको थियो। भारतले कप्तान रोहित शर्मा, विराट कोहली र श्रेयश लयरलाई सुरुवातमै गुमाउन पुगेको थियो। रोहितले ११, विराटले ४ र श्रेयशले १४ रन बनाएका थिए।
त्यस्तै शुभम गिलले १०, रविन्द्र जडेजाले १४, श्रदुल ठाकुरले ३, कुल्दीप यादवले ४, जसप्रित बुमराहले १६ रन बनाए भने मोहम्म सिराज १ रनमा अविजित रहे।
पाकिस्तानका लागि साहिन शाह अफ्रिदीले ४ सर्वाधिक ४ विकेट लिए। त्यस्तै नसिम शाह र हरिस राउफले तीन-तीन विकेट लिए।
