काठमाडौं । हप्तामा दुई दिन विदा दिने सरकारको निर्णय एक महिना नबित्दै खारेज भएको छ ।
पेट्रोलियम पदार्थको खपत कम गर्न भन्दै सरकारले गत वैशाख २६ गते शनिबार र आइतबार दुई दिन सार्वजनिक विदा दिने निर्णय गरेको थियो । जेठ एक गतेदेखि हप्तामा दुई दिन सार्वजनिक विदा हुँदै आएको थियो ।
तर, एक महिना नबित्दै सरकारले हप्तामा दुई दिन विदा दिने निर्णय खारेज गरेको छ । आज (सोमबार) बसेको सोमबार बसेको मन्त्रिपरिषद बैठकले आइतबारको साप्ताहिक विदा खारेज गरेको हो । अर्थमन्त्री जनार्दन शर्माका अनुसार अब असार एक गतेदेखि शनिबार मात्र सार्वजनिक विदा हुने छ ।
हप्तामा दुई दिन बिदा दिने निर्णय व्यवहारिक नभएको भन्दै विभिन्न पक्षबाट आलोचना हुँदै आएको थियो । हप्तामा दुई दिन बिदा दिने निर्णयविरुद्ध सर्वोच्च अदालतमा रिट समेत परेको छ । अधिवक्ता रामबहादुर शाही, तेजकुमार लोहिया, सन्तोष भण्डारी र त्रिलोकबहादुर चन्दले आवश्यक तयारीबिनै हप्तामा २ दिन बिदा दिने निर्णय गरेकाले उक्त निर्णय रोक्न माग गर्दै रिट दायर गरेका थिए ।
संघीय सरकारले हप्तामा दुई दिन बिदा दिँदै आएपनि स्थानीय तहहरूले भने अवज्ञा गर्दै आएका थिए ।
