काठमाडौं । उपप्रधानमन्त्री एवं गृहमन्त्री नारायणकाजी श्रेष्ठले सुन प्रकरणमा माओवादी उपाध्यक्ष कृष्णबहादुर महरा संलग्न भएको पुष्टि भए सरकारले नछाड्ने बताएका छन् । शनिबार ललितपुरमा माओवादी केन्द्रले सुरु गरेको विशेष अभियानको उद्घाटन गर्दै गृहमन्त्री श्रेष्ठले माओवादी नेता भएपनि उनलाई नछाड्ने बताएका हुन् ।
माओवादीको नेतृत्वमा सरकार भएकाले आफूहरूलाई जोगाएर विपक्षीलाई मात्र कारबाही गर्ने हो कि भन्ने शंका गरेको पाइएको भन्दै उनले जुनसुकै तह, जुनसुकै पार्टीको र जोसुकै भएपनि कारबाही गरेर छाड्ने जिकिर गरे ।
गृहमन्त्री श्रेष्ठले भने, ‘९ किलो सुन प्रकरणमा माओवादी नेता जोडिएको कुरा आएको छ । जोसुकै होस्, जुनसुकै पार्टीको नेता होस् अपराधमा संलग्न भएको पुष्टि भए सरकारले छाड्दैन ।’ उनले माओवादीको नेतृत्वमा सरकार भएकाले आफूलाई चोख्याउँछ कि भन्ने शंका गरेको बताउँदै उनले भने, ‘कुनै शंका नगरे हुन्छ, कांग्रेस, एमाले, माओवादी, एकीकृत समाजवादी जुनसुकै पार्टीको जुनसुकै तहको नेता भए पनि सरकारले छाड्दैन ।’
