काठमाडौं । खानेपानी मन्त्री अब्दुल खानले राजीनामा दिनुभएको छ । प्रधानमन्त्री पुष्पकमल दाहाल ‘प्रचण्ड’ समक्ष मन्त्री खानले शुक्रबार राजीनामा दिनुभएको हो ।
प्रधानमन्त्रीले मन्त्रिपरिषद विस्तार गर्न लागेकै बेला जनमत पार्टीबाट सरकारमा गएका खानले राजीनामा दिएका हुन्।
सिके राउत नेतृत्वको जनमत पार्टीले सुरुदेखि नै उद्योग मन्त्रालयमा दाबी गर्दै आएको थियो । खानेपानी मन्त्री नियुक्त भएपछि पनि झन्डै एक महिना खान कार्यभार सम्हाल्नै गएका थिएनन्।
अहिले मन्त्रिपरिषद विस्तार हुँदा उद्योग मन्त्रालय पाउने भनिए पनि नदिएपछि उनले राजीनामा दिएको बताइएको छ ।
तर जनमत पार्टीका नेता वीपी साहले भने नीति तथा कार्यक्रममा समेटिएका विषयमा कार्यान्वयन नभएको, आफूहरूले उठाएका माग मुद्दामा पनि कुनै चासो नभएकाले सरकारबाट बाहिरिएको प्रतिक्रिया दिए।
