नेपालगञ्ज । नेपालगञ्ज उच्च अदालत बार एसोसिएसनले आफ्नै कार्यालयमा बसिरहेकी एक अधिवक्तामाथि भएको कुटपिट तथा दुर्व्यवहारको घटनाप्रति गम्भीर ध्यानाकर्षण जनाएको छ र दोषीलाई तत्काल कानुनी दायरामा ल्याई कडा कारबाही गर्न माग गरेको छ।
बारका अनुसार एसोसिएसनकी सदस्य अधिवक्ता दुर्गा कुमारी खड्कामाथि शुक्रबार उनको ल फर्ममै बसिरहेको अवस्थामा केही व्यक्तिहरू जबरजस्ती प्रवेश गरी हातपात तथा दुर्व्यवहार गरेका हुन्। घटनाका क्रममा कार्यालयभित्र रहेका महत्वपूर्ण कागजात, मुद्दाका फाइल तथा अन्य सामग्री समेत छरपस्ट पारिएको र भौतिक क्षति पुर्याइएको जनाइएको छ।
जारी प्रेस विज्ञप्तिमा पीडित अधिवक्तामाथि अपशब्द प्रयोग, दुर्व्यवहार र हातपातजस्ता अमर्यादित गतिविधि भएको उल्लेख गर्दै यसलाई सम्पूर्ण कानुन व्यवसायीको पेशागत मर्यादा र सुरक्षामाथि गम्भीर आक्रमणका रूपमा व्याख्या गरिएको छ।
उच्च अदालत बारका अध्यक्ष पवन कुमार गुप्ता र जिल्ला बारका अध्यक्ष मेहर सिंह खत्रीले संयुक्त रूपमा विज्ञप्ति जारी गर्दै घटनाको कडा भर्त्सना गरेका छन्। उनीहरूले यस्ता गतिविधिमा संलग्न व्यक्तिहरूलाई तत्काल पहिचान गरी कानुन बमोजिम कडा कारबाही गर्न माग गरेका छन्।
बार एसोसिएसनले नेपाल सरकार, गृह मन्त्रालय तथा प्रहरी प्रशासनसँग कानुन व्यवसायीहरूको जिउधनको सुरक्षा सुनिश्चित गर्न, यस्ता घटना दोहोरिन नदिन प्रभावकारी कदम चाल्न र दोषीमाथि अविलम्ब कानुनी कारबाही अघि बढाउन आग्रह गरेको छ। 
