बाँके । बाँकेको जानकी गाउँपालिकाले सुशासन प्रर्वद्धन तथा भ्रष्टाचार नियन्त्रण गर्ने बताउदै गाउँपालिका उपाध्यक्ष राम प्यारी यादवले ५९ करोड ५३ लाख ५९ हजार रुपैया विनियोजन गरेको जानकारी दिइन् ।
गाउँपालिकाको १२ औं गाउँ सभामा शुक्रबार गाउँपालिका अध्यक्ष छब्बन खाँले ‘म भ्रष्टाचार गर्दिनँ, म भ्रष्टाचार हुन दिन्नँ’ भन्ने प्रतिज्ञा सहितको कार्य संस्कृतिको प्रर्वद्धन गरिने बताए ।
यस्तै आगामी साउन १ गतेदेखी गाउँपालिकाभित्र कसैको घरमा छोरी जन्मिन्छ भने उसको खातामा गाउँपालिकाले ५ हजार रुपैयाँ जम्मा गरिदिने अध्यक्ष खाँले बताए । यसैगरी करमा ५० प्रतिशत छुट दिने निर्णय गरिएको पनि उनले भनाइ थियो ।
गाउँपालिकाले प्रस्तुत गरेको आर्थिक वर्ष २०७९/८० को नीति तथा कार्यक्रममा गाउँपालिकाले आर्थिक विकासतर्फ कृषि तथा पशु, सहकारी एवं वित्तीय व्यवस्थापन र उद्योग, सामाजिक विकासतर्फ स्वास्थ्य तथा सरसफाई, शिक्षा युवा तथा खेलकुद, जेष्ठ नागरिक महिला बालबालिका तथा अपांग, सँस्कृति तथा पर्यटनलाई समेटिएको छ ।
त्यस्तै पुर्वाधार विकासतर्फ पुर्वाधार विकास, भुमि तथा भवन ब्यवस्थापन, वातावरण तथा विपत व्यवस्थापनतर्फ वन वातावरण तथा विपद व्यवस्थापन, सार्वजनिक सेवा तथा क्षमता विकासतर्फ सुशासन तथा सेवा प्रवाह, राजश्व प्रशासन र न्याय प्रणाली सम्बन्धी विषयलाई प्राथमिकता दिइएको छ ।
सभामा वडा नम्बर ५ का वडाअध्यक्ष एवम् सभाका सदस्य टिकानाथ यादवले स्वागत गरेका थिए । यस्तै उक्त सभामा विषयगत रुपमा सभाका सदस्यहरु जगदिश प्रसाद हरिजन, टिकानाथ यादव, राजेन्द्र सिंह लगायतले बोलेका थिए ।
गाउँपालिका अध्यक्ष खाँको सभाध्यक्षतामा आयोजित सभामा उपाध्यक्ष रामप्यारी यादव, वडाअध्यक्ष, कार्यपालिका सदस्य तथा सदस्यहरुको उपस्थिती रहेको थियो । सभा सञ्चालनको सहजीकरण प्रमुख प्रशासकीय अधिकृत बस बहादुर रानाले गरेका थिए ।
उक्त सभामा पहिलो दिन नीति तथा कार्यक्रम प्रस्तुत गरिएको थियो भने दोस्रो दिन आज शुक्रबार ५९,५३,५९,००० बजेट उपाध्यक्ष राम प्यारी यादवले प्रस्तुत गरेको प्रमुख प्रशासकीय अधिकृत रानाले जानकारी दिए ।
उपाध्यक्ष यादवले प्रस्तुत गरेको बजेटमा आर्थिक विकास तर्फ पचहत्तर लाख, सामाजिक विकास तर्फ क करोड पैंसठ्ठी लाख, पुर्वाधार विकास तर्फ बीस करोड नब्बे लाख उन्नसाठ्ठी हजार, वन तथा बिपत व्यवस्थापन तर्फ दश लाख र सुशासन तथा संस्थागत क्षमता बिकास तर्फ दश करोड असी लाख रुपैयाँ बिनियोजन गरिएको छ ।
