बाँके । लुम्बिनी प्रदेश प्रहरी प्रमुख प्रहरी नायव महानिरिक्षक उमेशराज जोशीले जिल्ला प्रहरी कार्यालय बाँकेको आज शुक्रबार निरीक्षण गर्नु भएको छ । सोक्रममा शाखाहरुको निरीक्षण सहित कार्यरत प्रहरी कर्मचारीहरुलाई उहाँले निर्देशन समेत दिनुभयो ।
प्रदेश प्रहरी प्रमुख जोशीले कानुनको परिधि भित्र रहदै प्रहरी आचरण र ब्यवहारमा सुधार सहित व्यक्तिगत लाभ भन्दा संगठनको हित र बिकासलाई प्राथमिकतामा राखेर काम गर्न मातहतका प्रहरीलाई निर्देशन दिनुभयो ।
प्रदेश प्रहरी प्रमुख प्रहरी नायव महानिरीक्षक जोशीले प्रहरी कर्मचारीहरु अनुशासनमा रही जिम्मेवारीका साथ कार्य सम्पादन गरेमा अपराध अनुसन्धान, सुरक्षा लगायतका प्रहरी कार्यमा सफलता मिल्ने विश्वास समेत व्यक्त गर्नुभयो । कार्यक्रममा जिल्ला प्रहरी कार्यालय बाँकेका प्रमुख प्रहरी उपरीक्षक सुवास बोहराले जिल्लाको सम्पूर्ण प्रहरी परिचालन, प्रहरी गतिविधि र शान्ति सुरक्षाका विषयमा जानकारी गराउनु भएको थियो । सोही अवसरमा प्रहरी नायव उपरीक्षक नारायण डाँगी लगायतले प्रदेश प्रहरी प्रमुख जोशीलाई स्वागत गर्नु भएको थियो । 
