काठमाडौँ । नेपाल प्रहरीको केन्द्रीय अनुसन्धान ब्युरो (सीआईबी) ले नेकपा (माओवादी केन्द्र)का उपाध्यक्ष तथा पूर्वसभामुख कृष्णबहादुर महरालाई पक्राउ गरेको छ। उनलाई भन्सार ऐन, २०६४ र सङ्गठित अपराध सम्बन्धी कसुरमा संलग्न रहेको आरोपमा पक्राउ गरिएको सीआईबीले जनाएको छ।
सीआईबीका एसएसपी शिवकुमार श्रेष्ठद्वारा जारी विज्ञप्तिअनुसार महरालाई २०७९ पुस १० गते त्रिभुवन अन्तर्राष्ट्रिय विमानस्थल हुँदै नेपाल आएका दुई जना चिनियाँ नागरिकसँग सम्बन्धित सुन तस्करी प्रकरणको अनुसन्धानका क्रममा पक्राउ गरिएको हो।
उक्त दिन ती नागरिकले दुईवटा सुटकेसमा ७३ बट्टामा प्याक गरिएको ७३० थान भेप नेपाल भित्र्याएका थिए। सो क्रममा भन्सार कार्यालयको स्टोरमा नासु रेवन्त खड्कासहितको जिम्मामा रहेको ८ करोड ५५ लाख २८ हजार ३७४ रुपैयाँ बराबरको सुन अवैध रूपमा बेचबिखन गरी आपराधिक लाभ लिएको प्रमाण भेटिएको सीआईबीले जनाएको छ।
अनुसन्धान अनुसार, यो सुन बिक्रीबाट प्राप्त रकम आपराधिक समूहमार्फत लाभ उठाइएको र त्यसमा पूर्वसभामुख महराको संलग्नता रहेको प्रारम्भिक निष्कर्षमा प्रहरी पुगेको बताइएको छ। सीआईबीले घटनाबारे थप अनुसन्धान जारी राखेको जनाएको छ।
