बाँके । राष्ट्रिय स्वतन्त्र पार्टी (रास्वपा) ले बाँके निर्वाचन क्षेत्र नं. २ बाट मोहना अन्सारीलाई उम्मेदवार बनाएसँगै जिल्लाभरि परिवर्तनको बहस तीव्र बनेको छ । सीमावर्ती जिल्लाको पहिचान बोकेको बाँकेमा वर्षौँदेखि जरा गाडेर बसेका समस्या—तस्करी, लागुऔषध कारोबार, बेरोजगारी, कमजोर सेवा प्रवाह र भ्रष्टाचार—माथि रास्वपाले स्पष्ट, मुद्दामुखी र जनकेन्द्रित एजेण्डा अघि सारेको छ ।
क्षेत्र नं. २ मा देखिने समस्या केवल एउटा निर्वाचन क्षेत्रको मात्र नभई समग्र बाँके जिल्लाको साझा पीडा भएको स्थानीयको बुझाइ छ । यही यथार्थलाई आत्मसात् गर्दै उम्मेदवार अन्सारीले “राजनीति पदका लागि होइन, सेवाका लागि” भन्ने धारणा अघि सार्दै आउनु भएको छ ।
सीमा सुरक्षा र लागुऔषध : बाँकेको साझा चुनौती
खुला सीमाका कारण बाँके लामो समयदेखि तस्करी, लागुऔषध कारोबार र आपराधिक गतिविधिको चपेटामा पर्दै आएको छ । रास्वपाको घोषणापत्रले सीमा सुरक्षा र लागुऔषध नियन्त्रणलाई पहिलो प्राथमिकतामा राख्दै सुरक्षा निकाय, स्थानीय तह र समुदायबीच बलियो समन्वयको आवश्यकता औंल्याएको छ ।
विशेषगरी युवालाई लागुऔषधबाट जोगाउने अभियानलाई जिल्लास्तरमै सञ्चालन गर्ने प्रतिबद्धताले बाँकेका अभिभावक र समाजका अगुवामा आशा जगाएको छ ।
किसान, सिँचाइ र रोजगारी : विकासको मेरुदण्ड
बाँके कृषि प्रधान जिल्ला भए पनि किसानले अझै सिँचाइ, मल–बीउ र बजारको समस्या झेल्दै आएका छन् । सिक्टा सिँचाइ आयोजनाको प्रभावकारी सञ्चालन, किसानको उत्पादनको न्यूनतम समर्थन मूल्य र बजार सुनिश्चितता रास्वपाको मुख्य एजेण्डामा छन् ।
यसैगरी कृषि तथा साना उद्योगमार्फत स्थानीय रोजगारी सिर्जना गरी युवालाई विदेश पलायन हुनुपर्ने बाध्यता घटाउने योजना बाँकेका सबै पालिकासँग प्रत्यक्ष जोडिने विषय हो ।
शिक्षा, स्वास्थ्य र सामाजिक न्याय
सरकारी विद्यालयको गुणस्तर सुधार, मदरसा शिक्षालाई मूलधारसँग जोड्ने, छात्रा शिक्षामा विशेष ध्यान दिने विषयले बाँकेको सामाजिक संरचनालाई समेट्ने प्रयास देखिन्छ ।
ग्रामीण क्षेत्रमा आधारभूत स्वास्थ्य सेवा, एम्बुलेन्स, प्रसूति सेवा र निःशुल्क औषधिको पहुँच सुनिश्चित गर्ने प्रतिबद्धता स्वास्थ्य सेवामा पछाडि परेको बाँकेका बस्तीका लागि महत्वपूर्ण मानिएको छ ।
मुस्लिम, थारु, दलित तथा महिला समुदाय लक्षित कार्यक्रम, महिला उद्यमशीलता र समान अवसरको प्रत्याभूति रास्वपाको सामाजिक न्याय एजेण्डाको केन्द्रमा छ, जसले बाँकेको बहुसांस्कृतिक समाजलाई सम्बोधन गर्छ ।
बाढी–डुबान र पूर्वाधार : पुरानै समस्या, नयाँ समाधान
राप्ती नदी, नाला र वर्षायाममा हुने डुबान बाँकेका स्थायी समस्या हुन् । दीर्घकालीन बाढी नियन्त्रण, कच्ची सडक कालोपत्रे, पुल र नाला निर्माणमार्फत सुरक्षित आवागमन सुनिश्चित गर्ने योजना जिल्लाको विकाससँग जोडिएको छ ।
सुशासन र जवाफदेहिता
भ्रष्टाचारविरुद्ध शून्य सहनशीलता, छिटो र पारदर्शी सेवा प्रवाह, नागरिकता र लालपुर्जा जस्ता सेवामा सहज पहुँच र जनप्रतिनिधिको नियमित सार्वजनिक जवाफदेहिता रास्वपाको मुख्य राजनीतिक प्रतिबद्धता हो, जुन बाँकेका सबै नागरिकले प्रत्यक्ष अनुभूति गर्न चाहेको मुद्दा हो ।
“राजनीति होइन, सेवा”
मानवअधिकार अभियन्ता तथा कानुन व्यवसायीका रूपमा परिचित मोहना अन्सारीको उम्मेदवारीलाई धेरैले नैतिकता, इमानदारी र समावेशी प्रतिनिधित्वको प्रतीकका रूपमा लिएका छन् ।
रास्वपाले अघि सारेको एजेण्डाले बाँकेमा पुरानो राजनीतिक शैलीप्रति निराश जनतालाई नयाँ विकल्पतर्फ आकर्षित गरिरहेको देखिन्छ ।
यस अर्थमा, बाँके–२ को चुनाव केवल एउटा क्षेत्रको प्रतिस्पर्धा मात्र नभई समग्र बाँकेमा परिवर्तन चाहने आवाज र पुरानो राजनीतिक अभ्यासबीचको परीक्षाका रूपमा हेरिन थालेको छ ।
