काठमाडौं । काठमाडौं महानगरपालिकाका प्रमुख बालेन शाहले हालै सिंहदरबारमा भएको आगलागीका क्रममा महानगरको दमकलले भूमिका नखेलेको भन्ने आरोपको खण्डन गरेका छन्।
मंगलबार साँझ सामाजिक सञ्जालमा लामो स्टाटस लेख्दै उनले अराजक परिस्थितिका बीच पनि महानगरको टोलीले ज्यानको जोखिम मोलेर ५५ भन्दा बढी स्थानमा आगो नियन्त्रणमा खटिएको विस्तृत विवरण सार्वजनिक गरेका हुन्।
“यत्रो सिंहदरबार जल्दा काठमाडौं महानगरको दमकल कहाँ गयो ? सिंहदरबार जलाउने नै बालेन शाह हो !” जस्ता आरोपका बारेमा उल्लेख गर्दै उनले भने —
“हुँदै नभएको गलत प्रचार फैलाउनेहरूलाई एकमुष्ट रूपमा सम्बोधन गर्न यो लेख्दैछु।” मेयर शाहका अनुसार, भदौ २४ गते देशभरि अवस्था अस्तव्यस्त रहेको बेला पनि स्थानीय सरकार आफ्नो जिम्मेवारीबाट पछि हटेको थिएन।
सिंहदरबारमा आगो लागेलगत्तै दमकल पठाउने प्रयास गरिएको भए पनि आन्दोलनकारीको अवरोधका कारण तत्काल प्रवेश सम्भव नभएको उनले स्पष्ट पारे।
उनका शब्दमा —“नेपाली सेनाको दमकल सिंहदरबारभित्रै थियो, तर हुलका कारण काम गर्न सकेको थिएन। जब भिड अलिक शान्त भयो, २४ गते साँझ ८:१५ भित्रै महानगरको दमकल त्यहाँ पुगेको थियो।”
“सर्वोच्च अदालत परिसरमा आगो निभाएर त्यहाँका महत्वपूर्ण कागजपत्र बचाइएको प्रमाण हाम्रो टोलीसँग सुरक्षित छ,” उनले दाबी गरे।
“अभिभावक नभएका बिरामीका लागि हाम्रो टोली नै अभिभावक बनेको थियो।अपरेसनका बेला आवश्यक ‘Informed Consent Form’ मा समेत नगरप्रहरीले जिम्मेवारीसहित हस्ताक्षर गरेको छ,” शाहले लेखे।
शाहले आफ्नो कामप्रति राजनीतिक निहितार्थ खोज्नेहरूलाई असन्तुष्टि जनाउँदै भने —“मलाई यसका लागि कुनै जस चाहिएको छैन। तर कमसेकम आगो निभाउने, उद्धार गर्ने र उपचारमा खटिनेहरूलाई सम्मानजनक दृष्टिले हेर्नुहोस्। देशलाई अहिले चाहिएको कुरा एकता र सत्य हो — हल्ला र झुट होइन।”
