भैरहवा । नेकपा एकीकृत समाजवादी पार्टीका महासचिव घनश्याम भुसालले राजनीतिमा सुशासन र रोजगारीको सिर्जना नभए मुलुक बर्वादीको दिशातर्फ अघि बढ्ने बताएका छन् ।
शनिबार भैरहवामा आयोजित नेकपा एकीकृत समाजवादी पार्टी सिद्धार्थनगर नगर कमिटीको प्रथम अधिवेशनमा बोल्दै नेता भुसालले राजनीति भनेकै अरुका लागि काम गर्न कसम खाने भएको बताउँदै राजनीतिमा गलत प्रवृत्ति मौलाएका कारण मुलुकले दुःख पाएको बताए । उनले गलत कुरासँग सम्झौता नगरी झुठो र लोभलालचमा नपरी अनुशासित भएर राजनीति गर्न जरुरी भएको बताए ।
कार्यक्रममा एकीकृत समाजवादीका केन्द्रीय सदस्य तथा लुम्बिनी प्रदेशसभा सदस्य भगवती घिमिरेले युवाहरु समाजवाद निर्माणको लागि गम्भीर भएर अघि बढ्नुपर्ने बताइन् ।
यस्तै, केन्द्रीय सदस्य उमा काफ्लेले पार्टी बिचारले बन्ने हुनाले पार्टीको बिचार प्रष्ट हुन जरुरी भएको बताइन् । पार्टीलाई सुदृढ बनाउन प्रशिक्षणको आवश्यकता रहेको उनले बताइन् । पार्टीको शैली जनतालाई आकर्षित गर्ने खालको हुनुपर्ने उनको भनाइ छ ।
नगर अधिवेशनमा करिब ५० जनाभन्दा बढी पार्टी प्रवेश गरेका थिए । अधिवेशनले सारदुल मयुर कसौधनको नेतृत्वमा ३५ सदस्यीय नगर कमिटी गठन गरेको छ ।
