डुडुवा गाउँपालिकामा अध्यक्षको अनियमितता ढाकछोप गर्न आन्दोलन भडकाउने प्रयास : प्रदेश सांसद आहिर

बाँके । डुडुवा गाउँपालिकामा हालै उत्पन्न विवाद र आन्दोलनको विषयलाई लिएर लुम्बिनी प्रदेश सभा सदस्य एवं पूर्व मन्त्री भण्डारी लाल आहिरले गम्भीर ध्यानाकर्षण गराएका छन् ।

गाउँपालिकामा भएको घटनाबारे सार्वजनिक विज्ञप्ति जारी गर्दै सांसद आहिरले गाउँपालिका अध्यक्षले आफ्ना अनियमितता र भ्रष्टाचारलाई ढाकछोप गर्न "जेन-जी" आन्दोलनको नाममा आफ्नो पदको दुरुपयोग गरेको आरोप लगाएका हुन् ।

उनका अनुसार, गाउँपालिका कार्यालयको स्थायी वासस्थानमा गरिएको तोडफोड, आगजनी प्रयास तथा सेवामा अवरोधका कारण स्थानीय बासिन्दा त्रसित बनेका छन् । “गाउँपालिकाका जनतालाई आतंकित बनाउनका लागि अध्यक्षकै निर्देशनमा आफ्ना नजिकका व्यक्तिहरूमार्फत यो अवस्था सिर्जना गरिएको हो,” विज्ञप्तिमा भनिएको छ ।

सांसद आहिरले गाउँपालिका अध्यक्ष नरेन्द्र चौधरीले घटनामा आफू नेतृत्वमा कार्यालय तोडफोड गरिएको भनी लगाइएको आरोपलाई मनगढन्ते र वास्तविकताविपरीत भन्दै खारेज गरेका छन् । “जनताको न्यायोचित मागलाई दबाउन मेरो नाममा आरोप लगाइएको हो,” उनले स्पष्ट पारेका छन् ।

उनले डुडुवा गाउँपालिकामा विकास निर्माणका नाममा भएको व्यापक भ्रष्टाचार, मदिरा दुरुपयोग र अनियमितताले स्थानीय जनता आक्रोशित भएको बताउँदै, आन्दोलन वास्तविक जनआवाजबाट उठेको तर त्यसलाई राजनीतिकरण गरेर आफूलाई दोषी देखाउने षड्यन्त्र भएको बताएका छन् ।

“जनताले उठाएको मुद्दा सत्य हो । गाउँपालिकामा भएको भ्रष्टाचार र अनियमितता विरुद्ध म सधैं जनतासँगै छु,” सांसद आहिरको भनाइ छ । उनले गाउँपालिकामा ढाकछोप र मोलमोलाइ नगरी दोषीलाई कानूनी कारबाहीको दायरामा ल्याउन सम्बन्धित निकायलाई आग्रहसमेत गरेका छन् ।

डुडुवा गाउँपालिकामा भएको हालको अशान्ति र आन्दोलनलाई लिएर आरोप–प्रत्यारोप बढ्दो छ । एकातिर जनताले भ्रष्टाचारविरुद्ध आवाज उठाइरहेका छन् भने अर्कोतिर त्यसलाई ढाकछोप गर्न जिम्मेवार पदाधिकारी नै आन्दोलन भडकाउने प्रयत्नमा लागेको आरोप सार्वजनिक भएको छ । यसले स्थानीय राजनीति र जनजीवन अझै तनाबपूर्ण बन्ने देखिन्छ ।