बर्दिया । बर्दियाको बासगढी नगरपालिकामा कपडा बैक स्थापना गरिएको छ । बासगढी नगरपालिका र क्लोथ एण्ड फुड बैक नेपालको सहकार्यमा सो कपडा बैक स्थापना गरिएको हो । बैक स्थापना सँगै मङ्गलवार बासगढी नगरपालिका वडा नं ४ , ५ र ६ का ७ सय बढि लाई न्यानो कपडा बितरण गरिएको कपडा बैकका परिकल्पनाकार तथा अध्यक्ष कमल जिसीले बताए । आफ्नो घर टोल र समाज सफा राखौ । कोही कपडा विहीन नरहून् भन्ने मूल उद्देश्यका साथ देशभरका स्थानीय तह सँगको सहकार्यमा कपडा बैक स्थापनाको लक्ष्य रहेको जिसीले बताए । उनले हाल सम्म नेपाल भरका ९८ वटा पालिकाहरूमा बैक स्थापन गरि सञ्चालनमा रहेको जानकारी दिए । ‘पुनःप्रयोग महाअभियान’ले देशको धुकुटी जोगाउन र देश सफा गर्न सहयोग गरोस् भन्ने मेरो चाहना रहेको उनको भनाई छ ।
उनले हुनेले दान गर्ने नहुनेले सित्तैमा लैजान पाउन भन्ने उद्देश्यले बैक सुरुवात गरिएको उनको भनाई छ । उनले भिन्न मानिसहरूले सङ्कलन गरेका कपडाहरू प्रसोधन गरेर पुन प्रयोग गरिने समेत बताए । बासगढी नगरपालिकाका प्रमुख खड्क बहादुर खड्काले पालिकाले विगत देखिनै समाजिक क्षेत्रमा बिभिन्न क्रियाकलाप गर्दै आएकोमा हाल क्लोथ एण्ड फुड बैक सँगको सहकार्यमा कपडा बैक सञ्चालन गरिएको जानकारी दिए । उनले आवश्यकता अनुसारका कपडाहरू नियमित बितरण गरिने समेत जानकारी दिए । उनले निकट भविष्यमा फुड बैक समेत सञ्चालनमा ल्याइने बताए । कार्यक्रममा बासगढी नगरपालिका की उप प्रमुख ईन्दिरा चौधरी , बिभिन्न वडाका वडा अध्यक्ष , कार्यपालिका सदस्य , सो क्षेत्रका उद्योगी व्यवसायी सामाजिक व्यक्तित्व लगायतको सहभागिता रहेको थियो ।
