बाँके । बाँकेको नरैनापुर गाउँपालिका वडा नं. २ का अध्यक्ष मसूद अहमद शाहको बुबाको निधनमा वडामा आज शोकबिदा दिएको छ ।
शाहका बुबा पूर्व सांसद शैयद मेराज अहमद शाहको आज मंगलबार बिहान ७ बजे उपचारका क्रममा भेरी अस्पतालमा मृत्यु भएको भन्दै वडा सचिव लक्ष्मीकान्त मिश्राले एक विज्ञप्ती जारी गर्दै वडामा शोक बिदा दिएका हुन ।
वडाले मंगलबार एक विज्ञप्ती जारी गर्दै आजका लागि वडाको सबै प्रशासनिक कार्यालयसँगै सबै शैक्षिक संस्था बन्द रहने जनाएको छ । सँगै स्वास्थ्य संस्थामा आकस्मिकबाहेक सार्वजनिक बिदा दिइएको सचिव मिश्राले जानकारी दिनु भयो ।
यसैगरी गाँउपालिका अध्यक्ष शैयद इश्तियाक अहमद शाहका दाजु समेत रहेका मृतक मेराजको शोकमा पालिकाले बुधबार गाँउपालिकाको प्रशासनिक कार्यालयसँगै सबै शैक्षिक संस्था बन्द रहने जनाएको छ । साथै स्वास्थ्य संस्थामा आकस्मिकबाहेक सार्वजनिक बिदा दिइएको प्रमुख प्रशासकिय अधिकृत जनकलाल चौधरीले बताउनु भयो ।
मृतक शाह २०४८ सालमा बाँके क्षेत्र नं. १ बाट सांसदमा निर्वाचित हुनु भएको थियो भने उहाँ ३ कार्यकालका लागि नेपाल हज समितिको अध्यक्ष समेत रहनु भएको थियो ।
