विराटनगर । मोरङको धानपालथान ७ स्थित उखुबारीको खाल्डोमा भेटिएका दुई जना र ललितपुरको धापाखेलस्थित एक घरको कम्पाउण्डमा भेटिएका एक जनाको हत्या गरेको आरोपमा प्रहरीले थप २ जनालाई पक्राउ गरेको छ । पक्राउ परेका दुई जनालाई जिल्ला प्रहरी कार्यालय मोरङले शनिबार सार्वजनिक गरेको छ ।
पक्राउ पर्नेमा मोरङको रंगेली नगरपालिका ३ आमतोला बस्ने ३३ वर्षीय मोहमद सुभाम र सुनसरी देवागन्ज गाउँपालिका ६ बस्ने जिरोगौवाका १८ वर्षीय मोहमद हकिम रहेका छन् । उनीहरुलाई प्रहरीले शुक्रबार पक्राउ गरिएको जनाएको छ ।
यसअघि प्रहरीले सोही हत्याकाण्डमा संलग्न रहेको आरोपमा ३ जनालाई सार्वजनिक गरिसकेको छ । यसअघि मोरङ जहदा गाउँपालिका–४ घर भएका २९ वर्षीय दीनानाथ सोनार उर्फ अमित साह, सिराहा घर ३१ वर्षीय अनिल कुमार मण्डल र मोरङ धनपालथान गाउँपालिका–७ घर भएका ६२ वर्षीय नासिर आलमलाई पक्राउ गरी सार्वजनिक गरेको हो ।
मोरङ र ललितपुरमा धितोमा जग्गा राखेर बैंक ग्यारेन्टी मिलाएबापत आउने ‘कमिशन’ बाँडफाँडमा विवाद भएपछि ३ जनाको हत्या भएको प्रहरीको प्रहरीको प्रारम्भिक अनुसन्धानबाट खुलेको छ ।
गत मंसिर २८ मा ललितपुरको धापाखेलमा तेह्रथुम घर भएका ६२ वर्षीय मोहनप्रसाद लिम्बुको हत्या भएको थियो भने सप्तरी घर भएका शम्भु चौधरी र सुनसरीको धरान उपमहानगरपालिका–३ घर भएका राजेन्द्रकुमार श्रेष्ठलाई मोरङको धनपालथान गाउँपालिका–७ मा रहेको उखुबारीमा लगेर हत्या गरेको प्रहरीको अनुसन्धानबाट थाहा भएको छ । उक्त हत्या प्रकरणबारे प्रहरीले अनुसन्धान जारी राखेको छ ।
